قصيده رآحل غريب !
يابنت ياللي تسأليني أنا مين !
و وش قصة الدمعه ومعنى الكأبه؟
هاتي قلم بكتب من الشعر بيتين
ودوك الورق .. تلقين فيه الاجابه
انا الغريب .. اللي بدا رحلة البين
رآحل سرا من دون ياخذ زهابه
انا الجريح .. اللي بكى ناس غالين
مجروح قلب .. ومايل الوقت صابه
انا الاسير .. اللي وقف بين نارين
نار الفراق .. ونار شخص يهابه
انا الفقير .. اللي مشى سكة الدين
عفيف مايشكي على الناس مابه
والدمعه اللي عذبت محجر العين
حرف قريته .. يوم جاني جوابه
مكتوب فيه : القلب ماهو لشخصين
فيك ابتدا حبي .. وفيك انتهابه
وكآبتك !! لامن غدا الوقت بك شين
وجف الوطن !! والجو مابه سحابه
يابنت ...! وش لك بالعنا والعناوين !
وش لك بشخص مقفيات اركابه !
ولاتسأليني ياحزن ... انت من وين !!
راحل غريب وتاه .. محدن درابه
يابنت زوري بس شط المحبين
وتلقين فيه الاسئله والاجابه
للشاعر/فايز البجيدي
