مشـــــــــتاك
مشتاك راس المطر يغفه اعله صدر الغيم **** مدرار يبقه يصب ميجف أبد ضرعه
ومحتاج كلمة صدك لمن جذبنه يــــزيد **** ومحتاج وكفه خوي ومحزم ابربعه
ماريد غيمة التجي مزنة مطر بالصيف **** ولاريد حجي الغفل راعي بغنم يرعه
اني النذرت العمر بالدم رويت الكاع **** ظل دمي مثل التهر لامايجف نبعه
شرياني كطعوا وصل حتى الوريد اوياه **** بجروحي ماخيّطت لنهه الصفت وسعه
وخيط البصبري نفذ وظماده منه وبيه **** وأصبر وصبر ألصبر ظل منه بس قطعه
زمزم ومايي عذب دجله وفرات الخير **** ليش الجرف ماصبر مايحمل الوكعـــه
ادموع ناسي تصب يحفر دمعهه اخدود **** وخدود ملهه الدمع وحتاجت اللمعه
ظل يبجي الفرح وأنباك ثوب العيد **** دولابه فرنه وعبر للغربه بس يســـــعه
وهناك ذلة غرب وهموم هدة حيل **** نمسح موائد حزن والفرح شيرجعه
أ حلم بساعة فرح بلكي اموري تهون **** ماريد أبني القصر ومحصن ابقلعــــه
أتسلق ويه الفرح ماحس أبد موجود **** لو مره جاني ابحلم دا دلعـــــــــــــه
تبجيني دار الاهل يحضن صداهه اعتاب **** عمري قطاره اليمر مايوكف ابسرعه
شفت المكابر حلو شكد بيه كطعت أشواط **** صار الزهو رايتي ونلت اني بيه رفعه
خوان غدر الوكت يفتر عكس وياي **** اعلك أصابع شمع يغدرهه للشــــــمعه
واني النطرت الاخو بلكن يجيني اسناد **** جانت أخوه الكبل هسه الاخو يبلعه
وياما حيايا شفت تلدغ تضم الراس **** بالبوكه تزحف تجي تغافلي باللسعه
لامنه أني الردت بس منه ردت العون **** خنجر حسيته درع لن بالظهر طبعه
وديوان صبري نفذ وأدري لصبر مذبوح **** وجم ربعه هيه ألصفت محتاجه للربعه
اليمته أبقه أنتظر والراح يمته يعود **** مو عمري كله خلص شمعه باثر شمعه
حاير ونه وحيرتي رغم الصبر مذبوح **** رايد أحلف البجه هم تضحك الدمعه؟
الشاعر
عبدالرحمن البازي
