جف الخلك
ياجف ألخلك شمتاني حتى اتطــــــــول**مو كافي تظـــــــــل بضنوني متحدد
ضميرك اعور ودجالك الـــــــــــينخاك**ونتـــــــــــه ابين تصعب بين متشدد
مثل باب أنقفــــــل ويعاتب المفتـــــاح**يا مفتاح هوه الباب مـــــــــــــــتردد
حسبت هوايه أحبهم بس كبل ماكـــول**الاكي جروحي بيهم هيــــــــه التعدد
حزن كلبي وعيوني وجفي من يعتـــاز**كلهه ويه اعز ناسي بداخلي تفرهـد
آنه أكبال عينك يلكلت مــــــــــــاشوف**جنت بظهري تمشي وعميـه التوجد
عاين صورتك تشبه حلاة البيــــــــــك**ومسح صورتي والكاك مــــــــتوسد
وارد اصفن عليهن حد عمـاة البـــــال**ورمي ابال فكري بدون مـــــــــاسدد
يروحي شبيج ميزي بين هـــــذا وذاك**بين ألما قصد والجاي متعمـــــــــــد
اكو اليضحك يجيج وسن كفاه يبـــــان**يلوذ بحاجتج وبخاطـــــــــــــره يبرد
أفز مرات افرح من كثر مــــــــــاخاف**من خوفي بلساني أفراح مــــــــاردد
يعت بيـه جرح تعبني صــــــار اسنين**واكف متجي وحسبالي متمـــــــــــدد
أتمنه أشوفك يلي مـــــــــــــــــاتنشاف**بحسن نيتي تهد وجايني تهـــــــــدد
تكلي آني أطلبك ودري مــــــــامطلوب**وغمضهن وكل الروحي مــــــمسدد
أنصحك لاتأمن عين بيهــــــــه تشوف**اذا مو حتى باذنك كون متأكــــــــــد
لاتكطع أمل مابين كـــــــاف ونــــــون**يجوز يطك ورد للبطل يـــــــــــــورد
ضميرك عين رمده براسك اتخليـــــــه**لازم تنزعه أولا الثانية أترمــــــــــد
دهد أخيول فكرك هدت الـــــــــفرسان**رسن فكرك على الخيال مـــــــــتمرد
ليش الدنيا تلوي لساني مـــــن يصيح**وللظالم تهد السانهــــــــــــــــه يغرد
هيه بوكت يوسف مو قميصـــــه تريد**هيه بعف زليخــــــــــــه جانت اتقدد
لذلك ذيب يوسف مــــاطلع غلطــــــان**لأن جان بضميره إنسان متزهـــــــد
هسه الذيب مات وصرت وحــدك ذيب**بس الفرق يجمع ونتـــــــــــه التفرد
أسنين وياك آنه المبرد وحــــــد سيف**الـــــــــــــمبرد عمه والسيف متسيد
بمراية صدك كمت آنه أشوف الــروح**وعلى نفسي أعاين خاف متقلــــــــد
طلع بيه جرح مو ربع آنه ويــــــــــاه**ماكرهه ولاكن مارضه يهــــــــــــود
الشاعر
سعيد أكرم الأحمد
2012
